Boyíké

Útá Wikipedia.
Kokɛndɛ na: bolúki, boluki

Boyíké elakísí míngi mpɔ̂ na nkómbó o mambí ma lokótá, ekɛsɛní na bomɔ̌kɔ́.


Ndakisa[kokoma]

O lokóta la lingála :

  • moto na bɔ̌kɔ́ ekómí bato na boyíké ;
  • loyémbo na bɔ̌kɔ́ ekómí nzémbo na boyíké ;
  • tatá na bɔ̌kɔ́ ekómí batatá na boyíké.
  • ntaba na bɔ̌kɔ́ ezalí bobɛ́lɛ́ ntaba na boyíké o lingála la sukúlu, tǒ mpé ekómí bantaba na boyíké o lingála la balabala.

O lokóta la falansé mpó na kobóngola liloba o boyíké esengeli 'te obakisa s na liloba lîná, kasi maloba makɛ́ matosaka mambí mâná tɛ́ mpé mabóngwama loléngé losúsu o boyík é:

  • homme na bɔ̌kɔ́ ezalí hommes na boyíké, kasi elobámí loléngé mɔ̌kɔ́ ;
  • cheval na bɔ̌kɔ́ ezalí chevaux na boyíké.

Boyíké o Lingála[kokoma]

O lingála kobóngola nkómbó úta bɔ̌kɔ́ téé na boyíké ezalí kolanda kelási níni nkómbó êná ezalí.

Nkómbó ya bato iye izángi libandeli tǒ ibandi na Mo to Mw[kokoma]

Nkómbó ya bato iye izángi libandeli, bakobakisa Ba libosó lya nkómbó êná

Ndakisa
Mamá → Bamamá
Mamá wa ngáí azalaka kofánda na Kongó-Kinsásá → Bamamá ba bísó bazalaka kofánda na Kongó-Kinsásá
Ndeko → Bandeko
Moto óyo azalí ndeko wa ngáí → Bato baye bazalí bandeko ba ngáí

Nkómbó ya bato iye ibandi na Mo to Mw ekobóngwana na Ba

Ndakisa
Moyékoli → Bayékoli
Moyékoli óyo azalí na moléndé tɛ́ → Bayékoli baye bazalí na moléndé tɛ́.
Mosáli → Basáli
Mosali asengeli na lifúta → Basáli basengeli na lifúta
Mwǎna → bǎna
Mwǎna ôazalí mwǎna wa sóngóló → na bazalí na ba sóngóló
Mwǎsí →
Mwǎsi óyo azalí mpenzá kitɔ́kɔ → baye bazalí mpenzá kitɔ́kɔ

Nkómbó iye isangisama mpé itali bato, kaka nkómbó ya libosó ndé ekobóngwana na boyíké nkómbó ya mibalé ekotíkala sé bôngó.

Ndakisa
Tatá-mwǎsí → Batatá -mwǎsí
Tatá-mwǎsí, nɔ́kɔ́ mpé tatá-lɛ́kí bakútanaki mpó na likambo lya libála → Batatá-mwǎsí, banɔ́kɔ́ mpé batatá-lɛ́kí bakútanaki mpó na likambo lya libála
Mamá-lɛki → Bamamá lɛki

Kasi ezalí na nkómbó ikɛ iye ilandaka mobéko muye tɛ́.

Ndakisa
Lipásamapása
Mamá abóti mapása kasi lipása lyɔ̌kɔ́ akufi o mbótama.
Elɛngɛ́ → Bilɛngɛ́
Elɛngɛ́ mobáli akɛ́í etumba → Bilɛngɛ́ babáli bakɛ́í etumba

Nkómbó iye idéfami na nkóta ya bapaya[kokoma]

Nkómbó eye eúti na lokóta losúsu etíkalaka sé loléngé lûná o boyíké mpé ebóngwamaka tɛ́ káka mambí masúsu na kati ya faláze ndé ekolakisa 'te nkómbó êná ezalí na boyíké lokóla likelelo tǒ bilɔ́kɔ bisúsu.

Ndakisa
Mésá → Mésá
Mésá ezalí → Mésá izalí
Sapáto → Sapáto
Sapáto esálami na lomposo la nyama → Sapáto isálami na lomposo la nyama

Nkómbó iye ibandi na mongóngó mwa zɔlɔ (N to M)[kokoma]

Nkómbó iye ibandi na mongóngó mwa zɔlɔ itíkalaka sé loléngé luna na boyíké mpé ebóngwanaka tɛ́ káka mambí masúsu na kati ya faláze ekolakisa 'te nkómbó êná ezalí na boyíké lokóla likelelo tǒ bilɔ́kɔ bisúsu.

Ndakisa
Ntaba → Ntaba
Ntaba yɔ̌kɔ́ ezwami o gbagba → Ntaba íbalé izwami o gbagba.
Ndɛkɛ → ndɛkɛ
Ndɛkɛ ezalí nyama eye ezalaka na mapapú → Ndɛkɛ izalí nyama iye izalaka na mapapú

Nkómbó iye ibandi na Mo, Mu to Mw[kokoma]

Nkómbó iye ibandi na Mo, Mu to Mw sɔ́kí yangó etali bato tɛ́ ekobóngwana na boyíké na Mi
Ndakisa
Molangi → Milangi
Molangi muye muzalí molaí → Milangi miye mizalí milaí.
tuka → tuka
tuka mwa ngáí mozalí kotámbola tɛ́ → tuka mya ngáí mizali kotámbola tɛ́

Nkómbó iye ibandi na E[kokoma]

Nkómbó iye ibandi na E ikobóngwana na boyíké na Bi
Ndakisa
Elílí → Bilili
Elílí eye ezalí kobángisa ngáí → Bilílí biye bizalí kobángisa ngáí.
Ekólo → Bikólo
Ekólo yɔ̌kɔ́ ebêngami Kongó-Kinsásá → Bikólo balé bibêngami Kongó; Kongó-Kinsásá na Kongó-Brazzaville

Nkómbó iye ibandi na Lo[kokoma]

Nkómbó iye ibandi na Lo ikobóngwana na boyíké na Ma
Ndakisa
Lokolo → Makolo
Lokolo la ye la mobali lobúkani → Makolo ma yě mansɔ balé mabúkani.
Lobɔ́kɔ → Mabɔ́kɔ
Lobɔ́kɔ la ngáí la mobali luzalí lolaí koleka lobɔ́kɔ la ngáí la mwǎsí → Mabɔ́kɔ ma ngáí mansɔ balé mazalí malaí ndéngé yɔ̌kɔ́

Nkómbó isúsu iye ibandi na Lo[kokoma]

Nkómbó isúsu iye ibandi na Lo ikobongwana na boyíké na N to M eye elobami na mongóngó mwa zɔlɔ
Ndakisa
Lokásá → Nkásá
Lokásá luye luzalí kolobela likambo litali boyíké → Nkásá iye izali kolobela makambo matáli boyíké.
Lopángo → Mpángo
Lopángo la ngáí luzalí lonɛnɛ → Mpángo ya ngáí izalí inɛnɛ

Nkómbó iye ibandi na Li[kokoma]

Nkómbó iye ibandi na Li ikobóngwana na boyíké na Ma
Ndakisa
Lingómbá → Mangómbá
Lingómbá lya mombɔ́ngɔ → Mangómbá ma mombɔ́ngɔ.
Lilála → Malála
Lilála lya kopɔlɔ likɔpɔlisa malála mansɔ

Nkómbó iye ibandi na Bo[kokoma]

Nkómbó iye ibandi na Bo ekobóngwana na boyíké na Ma
Ndakisa
Bopɔnɔmi → Mapɔnɔmi
Bopɔnɔmi bwa mokambi-ekólo buleki malámu mpenzá → Mapɔnɔmi ma bakambi mbulamatali maleki malámu mpenzá.
Bokúmbé → Makúmbé
Bokúmbé bwa ngáí bobúngákí na ezelelo mpɛ́po ya N'djili → Makúmbé ma ngáí mabúngákí na ezelelo mpɛ́po ya N'djili

Boyíké o Lingála lya balabála liye lilobami na Kinsásá[kokoma]

Lingála liye lilobami o Kinsásá litosaka mpenzá mambí ma lokóta la lingála tɛ́. Lyangó litósaka mpé mambí ma boyíke maye masili kolakisama o likólo lya lokásá luye tɛ́. O Kinsásá bato bakobóngola o boyíke ɛngɛ́bɛ́nɛ́ na bangó mɔ̌kɔ́ mpɔ̂ 'te Lingála liyekolami na kelási tɛ́. Eye ekosála 'te bato babóngola nkómbó ínsɔ na boyíke na bobakisaka ba atâ sɔ́kí nkómbó êná etali bato tɛ́.

Ndakisa

Bomɔ̌kɔ́ → Boyíke na lingála lya Kinsásá → Boyíke na kolandaka mambí ma lokótá la lingála

Ndáko → Bandáko → na esíká ya Ndáko
Ntaba → Bantaba → na esíká ya Ntaba
Nsósó → Bansósó → na esíká ya Nsósó
Sapáto → Basapáto → na esíká ya Sapáto
Ngómba → Bangómba → na esíká ya Ngómba

Ntángo isúsu bangó bakosangisa mitíndo mibalé mya kobóngolaka liloba na boyíke

Ndakisa

Bomɔ̌kɔ́ → Boyíke na lingála lya Kinsásá → → →Boyíke na kolandaka mambí ma lokótá la lingála

Lipása → Ba'ma'pása → → → na esíká ya Mapása
Lopángo → Ba'ma'mpángo → → → na esíká ya Mpángo
Molangi → Ba'mi'langi → → → na esíká ya Milangi
Masanga → Ba'ma'sanga → → → na esíká ya Masanga
Mokandá → Ba'mi'kandá → → → na esíká ya Mikandá
Loyémbo → Banzémbo → → → na esíká ya Nzémbo

Tálá mpé[kokoma]